ភ្នំពេញៈ អង្គការហាមប្រាមអាវុធគីមី (OPCW) កាលពីចុងសប្តាហ៍កន្លងមកនេះ បានបញ្ចប់ការស៊ើបអង្កេតរបស់ខ្លួនចំពោះសារធាតុគីមី ដែលបន្សល់ទុកបន្ទាប់ពីការវាយប្រហាររបស់អាមេរិក ក្នុងអំឡុងសង្គ្រាមវៀតណាម។
បើតាមការចេញផ្សាយរបស់ទីភ្នាក់ងារសារព័ត៌មានកម្ពុជា (AKP) បានឲ្យដឹងថា៖ «ក្រុមបច្ចេកទេសរបស់ [OPCW]បាន បញ្ចប់ការស៊ើបអង្កេតរបស់ខ្លួន ទៅលើអាវុធគីមី ក្នុងខេត្តចំនួនបីរបស់កម្ពុជា»។
រាជរដ្ឋាភិបាលកម្ពុជា បានអំពាវនាវទៅស្ថាប័នអន្តរជាតិនេះ កាលពីខែតុលា ក្នុងអំឡុងពេលមានភាពតានតឹងកាន់តែខ្លាំងឡើងជាមួយអាមេរិក។ កម្ពុជាបានចោទប្រកាន់អាមេរិកថា មិនទទួលខុសត្រូវ ចំពោះកេរដំណែលសង្គ្រាមរបស់ខ្លួន ខណៈស្ថានទូតអាមេរិក បានចោទប្រកាន់កម្ពុជាថា យកបញ្ហានេះទៅជារឿងនយោបាយ។
លោក ស៊ុន ជ័យ អគ្គលេខាធិការនៃអាជ្ញាធរជាតិអាវុធគីមី បានថ្លែងថា អង្គការហាមប្រាមអាវុធគីមី (OPCW) នឹងធ្វើតេស្តសារធាតុនោះ នៅប្រទេសហូឡង់ ប៉ុន្តែលោកមិនបានដឹងថា តើនឹងចេញលទ្ធផលនៅពេលណានោះទេ។
លោកបន្តថា៖ «កម្ពុជាមិនមែនជាមេពួកគេទេ។ យើងកំពុងស្នើសុំការជួយពីពួកគេ មិនអាចបញ្ជាពួកគេឲ្យផ្ញើរបាយ ការណ៍ថ្ងៃនេះថ្ងៃនោះបានទេ»។
លោក ជ័យ ក៏បានបដិសេធធ្វើអត្ថាធិប្បាយផងដែរ អំពីថាតើសារធាតុនោះ ជាសារធាតុអ្វីរហូតទាល់តែលទ្ធផលត្រូវបានផ្ញើមករដ្ឋាភិបាលកម្ពុជា។
អង្គការហាមប្រាមអាវុធគីមី បានបដិសេធជាដដែលៗ មិនធ្វើអត្ថាធិប្បាយ ដោយលើកហេតុផលថា«រក្សាភាពសម្ងាត់»។
កាលពីថ្ងៃទី ២០ ខែធ្នូឆ្នាំ ២០១៧ ពួកគេបាននិយាយថា លទ្ធផលនៃការធ្វើតេស្តនេះ នឹងមិនបង្ហាញជាសាធារណៈទេ។
អត្ថបទចុះផ្សាយរបស់ AKP បាននិយាយថា៖ «មានកន្លែងសង្ស័យថា មានអាវុធគីមីចំនួន ២៩ កន្លែងត្រូវបានរកឃើញ នៅក្នុងខេត្តស្វាយរៀង ពីរកន្លែងក្នុងខេត្តត្បូងឃ្មុំ និងដប់កន្លែងនៅខេត្តមណ្ឌលគិរី»។
ទោះយ៉ាងណាក្តី លោក ជ័យ បានថ្លែងថា វាទំនងជាមានកន្លែងដទៃៗទៀត នៅក្នុងខេត្តផ្សេងៗទៀតដែលមិនត្រូវបានស៊ើបអង្កេត៕ PS
