អាជ្ញាធរជាតិអាវុធគីមី

(ភ្នំពេញ)៖ អគ្គលេខាធិការដ្ឋាន អាជ្ញាធរជាតិអាវុធគីមី បានសហការជាមួយមជ្ឈមណ្ឌលឧត្តមភាពកាត់បន្ថយហានិភ័យ ផ្នែកគីមី ជីវសាស្រ្ត វិទ្យុសកម្ម និងនុយក្លេអ៊ែរ របស់សហភាពអ៊ឺរ៉ុប (EU CBRN Risk Mitigation Centres of Excellence Initiative) បានដំណើរការទៅលើគម្រោងលេខ៨១ ស្តីពីការធ្វើឱ្យកាន់តែ ប្រសើរទ្បើងនូវសមត្ថភាពសន្តិសុខជីវសាស្រ្តនៅក្នុងតំបន់អាស៊ីអាគ្នេយ៍ ដែលនឹងប្រព្រឹត្តទៅមានរយៈពេល ចំនួន ៥ថ្ងៃ ពីថ្ងៃទី១៣ ខែមីនា ឆ្នាំ២០២៣ រហូតដល់ថ្ងៃទី ១៧ ខែមីនា ឆ្នាំ ២០២៣។

សិក្ខាសាលាថ្ងៃទី២ ដែលត្រូវនឹងថ្ងៃទី១៤ ខែមីនា ឆ្នាំ២០២៣ បានធ្វើទ្បើងនៅសណ្ឋាគារ Hyatt Regency Phnom Penh ដោយមានការចូលរួមពីមន្រ្តីជំនាញមកពីស្ថាប័ន អន្តរជាតិ មានចំនួន ៣រូបៈ

– លោក John Jones ប្រធានដឹកនាំគម្រោងលេខ ៨១ ព្រមទាំងជាមន្ត្រីជំនាញទី១ នៃស្ថាប័នដំណោះស្រាយយុត្តិធម៌ព្រហ្មទណ្ឌប្រកបដោយនិរន្តរភាពអឺរ៉ុប (SCJS Eurupe) មកពីប្រទេស ប្រ៊ុចសែល

– បណ្ឌិត Jane Shalcross មន្រ្តីជំនាញទី៣ ស្ថាប័នភ្នាក់ងារសន្តិសុខ សុខភាពចក្រភពអង់គ្លេស (UKHSA)

– បណ្ឌិត Joris Sprokholt មន្រ្តីជំនាញ វិទ្យាស្ថានជាតិ សុខភាពសារធារណៈ និងបរិស្ថាន (RIVM) មកពីប្រទេសហូទ្បង់។

សិក្ខាសាលាខាងលើក៏បានអញ្ជើញមន្រ្តីពាក់ព័ន្ធតំណាងឱ្យស្ថាប័នជាតិអញ្ជើញចូលរួមផងដែរ ស្ថាប័នដែលបានអញ្ជើញចូលរួមមាន៖

-មន្រ្តីអគ្គលេខាធិការដ្ឋាន អាជ្ញាធរជាតិអាវុធគីមី

– មន្រ្តីក្រសួងសុខាភិបាល

– មន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍

– មន្រ្តីក្រសួងកសិកម្ម រុក្ខាប្រមាញ់ និងនេសាទ

– មន្រ្តីវិទ្យាស្ថានប៉ាស្ទ័រកម្ពុជា

– អគ្គនាយកដ្ឋានគយ និងរដ្ឋាករកម្ពុជា ។

គោលបំណងនៃការបង្កើតសិក្ខាសាលានេះទ្បើង គឺជាការធ្វើឱ្យកាន់តែប្រសើរទ្បើងនូវសមត្ថភាពសន្តិសុខជីវសាស្រ្ត នៅក្នុងតំបន់អាស៊ីអាគ្នេយ៍ គឺជាបេសកកម្មស្ទង់មតិទៅលើសន្តិសុខជីវសាស្រ្ត ដើម្បីជួបពិភាក្សាជាមួយភាគីពាក់ព័ន្ធ (Stakeholder) ទៅនឹងការងារ គីមី ជីវសាស្រ្ត វិទ្យុសកម្ម នុយក្លេអ៊ែរ (CBRN) នៅក្នុងប្រទេសកម្ពុជា ជាពិសេសភ្នាក់ងារពាក់ព័ន្ធក្នុងវិស័យសុខភាពសារធារណៈ និងវិស័យសុខភាពសត្វ ដើម្បីឯកភាពលើចំណុចជាអទិភាព និងផែនការសម្រាប់ការអនុវត្តសកម្មភាព របស់គម្រោងលេខ៨១។ លើសពីនេះទៅទៀតមានគោលបំណងចម្បងគឺការធ្វើឱ្យកាន់តែប្រសើរទ្បើងនូវសមត្ថភាពសន្តិសុខជីវសាស្រ្តនៅក្នុងតំបន់អាស៊ីអាគ្នេយ៍។

ជាក់ស្តែងសិក្ខាសាលានាថ្ងៃទី១៤ ខែមីនា ឆ្នាំ២០២៣ បានផ្តោតទៅលើចំណេះដឹងមួយចំនួនដូចជា៖

– ការវាយតំលៃពីហានិភ័យនៃឧបករណ៍ដែលបានប្រើប្រើក្នុងបន្ទប់ពិសោធន៍

-ការសិក្សាពីចំណុចខ្វះខាតក្នុងបន្ទប់ពិសោធន៍

-ប្រភពមេរោគមួយចំនួនដែលត្រូវយល់ដឹង ប្រភេទមេរោគដែលអាចឆ្លងពីសត្វទៅមនុស្ស

– វិធីសាស្រ្តក្នុងការចូលរួមទប់ស្កាត់នូវជំងឺឆ្លង ជាពិសេសការចូលរួមពីស្ថាប័នពាក់ព័ន្ធ

-ការសិក្សាស្វែងយល់ពីប្រភេទជំងឺ Brucella ដែលធ្លាប់កើតមាននៅប្រទេសអង់គ្លេស ។

ដោយ: នាយកដ្ឋានព័ត៌មាន និងគ្រប់គ្រងស្ថានីយ អគ្គលេខាធិការដ្ឋាន អ.ជ.អ.គ ។